fréttabréf

24. árgangur 2. tölublað apríl 2003.

Í þessu tölublaði:

Aðalfundur 30.apríl 2003

Innheimtugrátur

Ráðstefnu um friðun frestað til hausts

Afmælisráðstefna LÍ 2004

Á döfinni

.

Leiðrétting: Komið hefur í ljós að uppgefið netfang formanns í síðasta tbl., oatladottir@hotmail.com, er ekki vel virkt. Rétt netfang er olof.yrr.atladottir@vsn.stjr.is. Beðist er velvirðingar á þeim óþægindum sem þessi misskilningur hefur mögulega haft í för með sér.

Ábm. Ólöf Ýrr Atladóttir/Elín Ásgeirsdóttir/Inga Hrund Gunnarsdóttir

Útgefandi: Líffræðifélag Íslands

Pósthólf 5019, 125 R

biologia@centrum.is

Aðalfundur Líffræðifélags Íslands 2003

Aðalfundur Líffræðifélags Íslands verður haldinn miðvikudaginn 30. apríl kl. 17 í húsnæði Líffræðiskorar HÍ að Grensásvegi 12. Dagskrá aðalfundar er sem hér segir:

a. Skýrsla stjórnar.
b. Lagðir fram endurskoðaðir reikningar félagsins.
c. Lagabreytingar.
d. Kosning stjórnar og tveggja endurskoðenda.
e. Inntaka nýrra félaga.
f. Ákvörðun félagsgjalda.
g. Önnur mál.

Að loknum fundi verður boðið upp á léttar veitingar. Lög félagsins má nálgast á heimasíðu félagsins, http://notendur.centrum.is/~biologia.

Innheimtugrátur

Líffræðifélag Íslands leitar nú leiða til að auðvelda félagsmönnum greiðslu félagsgjalda. Jafnframt hvetur stjórn félagsins félagsmenn til að gera upp félagsgjöld fyrir aðalfund. Reikningnúmerið er: 0515-26-049867. Kennitala félagsins er: 470983-0199.

Ráðstefnu um friðun frestað til hausts

Eins og fram kom í fyrra fréttabréfi hugðist Líffræðifélag Íslands standa fyrir ráðstefnu undir yfirskriftinni “Friðun”, laugardaginn 12. apríl 2003. Þar var fyrirhugað að fjalla um friðun í breiðustu merkingu þess orðs, með hliðsjón m.a. af líffræði, umhverfisfræði, jarðfræði og heimspeki. Vegna dræmra undirtekta við því að halda ráðstefnu sem þessa á vordögum var ákveðið að fresta henni til hausts. Umfjöllunarefnin verða eftir sem áður m.a. forsendur friðunar, friðun tegunda, landsvæða og einstakra náttúrufyrirbrigða og hagfræði friðunar. Skipulag ráðstefnunnar verður með svipuðum hætti og ráðstefna um siðfræði lífvísinda nú á haustdögum. Líffræðifélagið lýsir hér með aftur eftir áhugasömum einstaklingum sem taka vilja þátt í skipulagningu þessarar ráðstefnu. Jafnframt er þeim sem hafa áhuga á að flyrtja erindi á ráðstefnunni bent á að hafa samband við formann félagsins, Ólöfu Ýrr Atladóttur, s. 6952039/551 7100. Þeim sem þegar hafa haft samband vegna þessa er þakkaður sá áhugi sem þeir hafa sýnt. Stjórn félagsins vonast eftir góðum undirtektum þeirra vegna þátttöku í haust.

Á döfinni í apríl 2003

Stjórn líffræðifélagsins þakkar góðar undirtektir við þessari nýjung í fréttabréfinu. Jafnframt auglýsir stjórnin eftir upplýsingum um áhugaverða viðburði í sumar og minnir forsvarsmenn fyrirtækja, stofnana og félagasamtaka á að senda inn upplýsingar um dagskrá næsta vetrar þegar hún liggur fyrir.

Námskeið hjá Endurmenntun HÍ – apríl 2003

Komum lýðheilsu á kortið!
Í samstarfi við Lýðheilsufélagið.

Lýðheilsa snýr að félagslegum og heilsufarslegum þáttum. Hún miðar að því að bæta heilbrigði, lengja líf og auka lífsgæði þjóða og hópa með almennri heilsuvernd, heilsueflingu, sjúkdómavörnumog annarri heilbrigðisþjónustu. Lýðheilsa byggir á samstarfi margra fræðigreina, s.s. heilbrigðisfræði, félagsfræði, líffræði, faraldsfræði, sálfræði, kynjafræði og stjórnmálafræði.
Ýmsar breytingar eru á döfinni hér heima og á alþjóðavettvangi hvað varðar framtíðarsýn og skipulag lýðheilsumála. Rætt er um mikilvægi samstarfs sem byggir á láréttri nálgun í stað afmarkaðra verkefna á sviði lýðheilsu. Lýðheilsa þarf að vera hluti af almennri umræðu um þjóðfélagsmál og sem flestar hliðar hennar ræddar á þeim vettvangi. Sem dæmi má nefna félagslegar, stjórnmálalegar, efnahagslegar og menningarlegar hliðar lýðheilsu.
Á námskeiðinu er leitast við að varpa ljósi á mikilvægi þessarar nálgunar til að ná árangri á sviði lýðheilsu.
Umsjón: Anna Björg Aradóttir hjúkrunarfræðingur hjá Landlæknisembættinu, Valgerður Gunnarsdóttir sjúkraþjálfari og sérfræðingur hjá hjá Íslenskri erfðagreiningu og Sigrún Gunnarsdóttir hjúkrunarfræðingur á Landspítala-háskólasjúkrahúsi.
Fyrirlesarar: Finn Kamper Jørgensen, forstjóri lýðheilsustofnunar Dana og innlendir sérfræðingar á sviði lýðheilsu.
Tími: Mán. 28. apríl kl. 9:00-16:00 og þri. 29. apríl kl. 8:30-12:00

Verð: 14.800 kr.

Afmælisráðstefna Líffræðifélags Íslands 2004

Á afmælisráðstefnu Líffræðifélags Íslands í samvinnu við Líffræðistofnun Háskólans 1999 var ákveðið að endurtaka leikinn að fimm árum liðnum. Fyrstu þreifingar vegna þessarar ráðstefnu eru hafnar og verið er að leita fulltrúa í ráðstefnustjórn. Ráðstefnan verður haldin á haustdögum 2004.

Stjórn Líffræðifélagsins reiknar fastlega með að jafnmikill hugur sé í líffræðingum nú og fyrir hálfum áratug og hvetur þá félagsmenn sem stunda rannsóknir á sviði líffræði að stefna að taka þátt í þessari stærstu kynningu á líffræðirannsóknum hér á landi.