Í þessu tölublaði:

Ráðstefna um friðun

Fyrirlestrafregnir

Áherslubreytingar í efnistökum fréttabréfs:

Líffræðifélag Íslands leitar nú nýrra leiða í starfsemi sinni. Meðal þess sem til stendur er að gefa út fréttabréf með breyttu sniði. Fyrirhugað er að safna upplýsingum sem víðast um fræðslufundi, fyrirlestra, námskeið og hvaðeina sem vakið getur áhuga áhugafólks um líffræði. Þetta er gert í ljósi reynslunnar; mikið framboð er á hvers kyns fyrirlestrum, fræðslufundum og námskeiðum fyrir áhugamenn um líffræðileg málefni og því þykir stjórn Líffræðifélagsins það vel þess virði taka saman yfirlit um framboðið fyrir félagsmenn, þeim til hægðarauka.

Á sama tíma hefur verið ákveðið að falla frá reglulegu fyrirlestrahaldi vegna dræmrar aðsóknar á undanförnum árum. Eftir sem áður eru félagsmenn hvattir til að koma á framfæri áhuguverðu efni til fyrirlestrahalds eða öðrum hugmyndum um nýjungar í starfsemi félagsins.

Af þessu tilefni langar stjórn LÍ að bjóða stofnunum, félagasamtökum og öðrum að kynna dagskrá sína hér í fréttabréfinu. Stefnt er að því að fréttabréfið komi út a.m.k. á tveggja mánaða fresti og verði þá stútfullt af möguleikum markhópsins til fróðleiks og afþreyingar.

Netfang fréttabréfsins er biologia@centrum.is og netfang formanns er oatladottir@hotmail.com.

Ábm. Ólöf Ýrr Atladóttir/Elín Ásgeirsdóttir

Útgefandi: Líffræðifélag Íslands

Pósthólf 5019, 125 R

biologia@centrum.is

Á döfinni í febrúar-mars 2003

Námskeið hjá Endurmenntun HÍ – vor 2003

Vefir vitundarinnar: Lífeðlisfræði streitu

Farið er í eðli og uppbyggingu streitukerfis mannslíkamans. Hvernig miðla heilasvæði áhrifum streitu um sjálfvirka taugakerfið og með hormónum til mismunandi marklíffæra? Greint er frá því hvernig innra ójafnvægi í tauga- og hormónastjórnun tengist menningarsjúkdómum, s.s. offitu, háþrýstingi, fullorðinssykursýki og þunglyndi. Einnig hvernig ýmsir þættir í heilsueflingu, s.s. svefn, slökun, hreyfing og mataræði, geta stuðlað að betra jafnvægi og vellíðan.
Kennari: Gunnlaugur B. Ólafsson atferlis- og lífeðlisfræðingur.

Tími: Mán. 10. feb.-31. mars 2003 kl. 20:15-22:15 (8x).

Vísindaleg aðferðafræði og greinaskrif

Fjallað er um þýðingu vísindalegrar aðferðar og markvissrar rannsóknarspurningar í allri rannsóknarvinnu. Kynntar eru helstu aðferðir í faraldsfræði og sérstaklega fjallað um skekkju (bias). Þýðing tölfræði fyrir skipulag rannsókna. Rannsóknaráætlun. Tölvuforrit, Netið og fleiri hjálpargögn sem styðjast má við í skipulagi og úrvinnslu í rannsóknum. Kynning á íslenskum og alþjóðlegum reglum um rannsóknir og hvernig útvega eigi tilskilin leyfi. Kynnt eru dæmi um klíníska rannsókn og dæmi um áhrif grunnrannsókna á lyfjaþróun. Fjallað um skrif vísindaritgerðar og nokkur hjálpartæki kynnt. Heimaverkefni.
Umsjón: Magnús Jóhannsson prófessor við HÍ.
Tími: Mán. 17. feb.-5. maí 2003 kl. 16:15-18:00 (10x - páskafrí 14. og 21. apríl

Fyrirlestratækni

Markmiðið er að auka færni þátttakenda í að undirbúa og halda árangursríka fyrirlestra eða kynningar. Oft vill brenna við að fyrirlestur nái ekki tilgangi sínum vegna þess að uppbygging er ómarkviss, glærur illa uppsettar, notkun annarra hjálpartækja handahófskennd eða að þau eru í aðalhlutverki, uppröðun í salnum er slæm, lýsing og/eða hljóð truflar framsetningu efnis.
Kennari: Vilmar Pétursson M.Sc. í Evrópustjórnun, stjórnendaþjálfari og ráðgjafi hjá IMG Deloitte.

Tími: Þri. 18. feb. 2003 kl. 8:30-12:30.

Uppsetning sýninga

Fjallað er um uppsetningu sýninga frá ýmsum sjónarhornum. Sérstaklega er fjallað um nýjustu strauma og stefnur í sýningagerð en einnig um sígild mál eins og uppsetningu texta og framsetningu efnis.
Umsjón: Stjórn FÍSOS, Gerður Róbertsdóttir deildarstjóri fræðsludeildar Árbæjarsafns og Karl Rúnar Þórsson safnvörður Byggðasafni Hafnarfjarðar.

Fyrirlesarar verða bæði innlendir og erlendir sérfræðingar á þessu sviði. Nánar auglýst síðar.

Tími: Fim. 20. og fös. 21. feb. 2003, kl. 9:00-17:00.

Hagnýt líftölfræði í rannsóknum

Fjallað er um notkun á hagnýtri tölfræði (líftölfræði) með hjálp algengra forrita fyrir smátölvur en umfjöllun um stærðfræðilega undirstöðu er haldið í lágmarki. Þjálfun með úrvinnslu heimaverkefna. Mælingar og mæligildi, skipulag tilrauna, dreifing, öryggisbil, aðfallsgreining, fylgni og tilgátuprófun. T-próf, ANOVA, kíkvaðrat, próf sem eru óháð dreifingu, stærð úrtaks, styrkur (power), útlagar (outliers) o.fl. Val aðferða og túlkun á niðurstöðum.
Kennari: Magnús Jóhannsson prófessor við HÍ.

Tími: Fös. 21. feb.-2. maí 2003 kl. 15:15-17:00 (10x).

Áhrif stera á mannslíkamann
Hvað eru sterar og hvernig vinna þeir? Fjallað er um hvaða áhrif sterar hafa á mannslíkamann og hvaða ávinningur sé af þeim í meðferð. Hverjar eru afleiðingarnar fyrir líkama og sál? Sterar og fæðubótarefni. Hjartasjúkdómar og hormónastarfsemi. Þrek og kyngeta. Læknisfræðileg, lagaleg og siðfræðileg álitamál við sterameðferð.

Umsjón: Pétur Ingvi Pétursson heilsugæslulæknir á Akureyri og Magnús Jóhannsson prófessor við HÍ.
Tími: Fös. 28. og laug. 29. mars 2003 kl. 9:00-16:00.

Rannsóknastofnun landbúnaðarins

Erindin eru haldin í fundarsal RALA á Keldnaholti kl. 10-11.

20. feb	Gæði á reyktum laxi, niðurstöður úr Evrópuverkefni	Helga Gunnlaugsdóttir
6. mars	Jarðvegshitun grasvalla	Björn Gunnlaugsson
20. mars	Þróunarvinna hjá Matra fyrir kjötframleiðendur og kjötiðnað	Magnús Guðmundsson

Náttúrufræðistofnun

Erindi verða haldin á miðvikudögum kl. 12.15 í sal Möguleikhússins á Hlemmi, gengið inn á horni Hverfisgötu og Hlemms. Erindin eru um 25 mínútur að lengd, auk 10 mínútna til fyrirspurna og umræðna.

12. febrúar	Kristján Jónasson, jarðfræðingur:	Kísilríkt berg á Íslandi
26. febrúar	Ólafur Einarsson, fuglafræðingur:	Náttúruverndaráætlun - tillögur N.Í.
12. mars	Ólafur Karl Nielsen, vistfræðingur:	Rjúpan og viðkoma fálkans
26. mars	Sveinn P. Jakobsson, jarðfræðingur:	Hryggir og stapar á Langjökulssvæðinu

Frá Garðyrkjuskólanum:

Asparryð og kynbætur -umhirða og grisjun trjáa í þéttbýli: Námskeið haldið í Þjóðmenningarhúsinu í Reykjavík þriðjudaginn 11. febrúar frá kl. 09:00 til15:30. Fyrir hádegi verður fjallað um umhirðu og grisjun trjáa í þéttbýli en eftir hádegi um rannsóknir á asparryði(Melampsora larici-populina) og kynbætur á ösp til þess að verjast ryði. Skráningar og nánari upplýsingar: Endurmenntunarstjóri Garðyrkjuskólans, mhh@reykir.is eða á heimasíðu skólans, www. reykir.is.

LANDSÝN - landgræðsla, skógrækt og skipulag
Landgræðslan, Suðurlandsskógar og Rannsóknastöð Skógræktar ríkisins á Mógilsá standa fyrir ráðstefnu um skipulag mismunandi landnýtingar, svo sem landgræðslu og skógræktar. Breyttar áherslur í landnýtingu hér á landi kalla á umræður um vinnubrögð í skipulagsmálum og viðhorf til þessara mála í samfélaginu. Ráðstefnan verður haldin á Kirkjubæjarklaustri dagana 26.-27. febrúar 2003 og er öllum opin. Föstudaginn 28. febrúar verður haldin námsstefna á sama stað fyrir skógarbændur og fagfólk í skógrækt. Fyrri hluta dagsins verða fluttir fyrirlestrar um skógrækt en eftir hádegi verður fjallað um skógrækt og ferðaþjónustu. Nánari upplýsingar fást hjá Suðurlandsskógum í síma 480 1824.

Ráðstefna um friðun

Líffræðifélag Íslands hyggst standa fyrir ráðstefnu undir yfirskriftinni “Friðun”, laugardaginn 12. apríl 2003. Fyrirhugað er að fjalla um friðun í breiðustu merkingu þess orðs, með hliðsjón m.a. af líffræði, umhverfisfræði, jarðfræði og heimspeki. Umfjöllunarefnin verða m.a. forsendur friðunar, friðun tegunda, landsvæða og einstakra náttúrufyrirbrigða og hagfræði friðunar. Skipulag ráðstefnunnar verður með svipuðum hætti og ráðstefna um siðfræði lífvísinda nú á haustdögum. Líffræðifélagið lýsir hér með eftir áhugasömum einstaklingum sem taka vilja þátt í skipulagningu þessarar ráðstefnu. Jafnframt er þeim sem hafa áhuga á að flyrtja erindi á ráðstefnunni bent á að hafa samband við formann félagsins, Ólöfu Ýrr Atladóttur, s. 6952039/551 7100.