Í tilefni af 25 ára afmæli Líffræðifélagsins og 30 ára afmælis Líffræðistofnunar
Háskólans hafa forstöðumenn félagsins og stofnunarinnar ákveðið að boða til ráðstefnu til almennrar kynningar á
líffræðirannsóknum á Íslandi. Áætlað er að halda ráðstefnuna á tveim til þrem dögum,
18.-20. nóvember n.k.
Ráðstefnan verður með svipuðu sniði og afmælisráðstefnan sem haldin var fyrir fimm árum en hún þótti takast
með miklum ágætum. Þá voru haldin 100 erindi og sýnd ríflega 130 veggspjöld. Að þessu sinni er áformað að halda
nokkur yfirlitserindi (45 mín., plenary) í stórum sal en einnig er reiknað með 50-80 styttri erindum (20 mín.)
þar sem líffræðingum gefst kostur á að kynna rannsóknir sínar. Þá er einnig gert ráð fyrir að margir vilji kynna
rannsóknir með veggspjöldum. Við viljum hvetja alla líffræðinga að draga fram það nýstárlegasta sem þeir hafa í
handraðanum og kynna á ráðstefnunni.
Nánari upplýsingar fást hjá ráðstefnustjórn í netföngunum
sigsnor@hi.is eða biologia@centrum.is
Ráðstefnugjöld hafa ekki verið endanlega ákveðin en verður stillt í hóf.
Aðalfundur föstudaginn 30.apríl
Stjórn Líffræðifélags Íslands minnir á aðalfund
félagsins, sem haldinn verður á föstudag, 30. apríl. Fundurinn verður haldinn í
fundarsal Vísindasiðanefndar að Laugavegi 103, 5.hæð og hefst kl. 17. Á dagskrá
eru venjuleg aðalfundarstörf, eins og áður hefur verið auglýst. Stjórn LÍ hvetur
félagsmenn til að mæta og taka þátt í umræðum um starfsemi félagsins.
Sett inn 9.feb 2004
Miðvikudaginn 11 febrúar kl. 16:00 í stofu 132 í Náttúrufræðahúsi HÍ, mun María Ingimarsdóttir gangast undir meistarapróf við líffræðiskor raunvísindadeildar Háskóla Íslands og halda fyrirlestur um verkefni sitt:
ÁHRIF HITAFALLANDA Á SMÁDÝRALÍF HÁHITASVÆÐA Á REYKJANESI OG VIÐ ÖLKELDUHÁLS
Jarðhitasvæði mynda afmörkuð búsvæði sem einkennast meðal annars af meiri hita og raka en finnst þar í kring. Markmið þessarar rannsóknar var að finna út hvað einkennir samfélag þeirra smádýra sem eru á ferli á heitri jörðu háhitasvæða og hvernig það breytist með hitafallanda. Smádýr voru veidd í fallgildrur sem staðsettar voru á hitafallanda tveggja háhitasvæða, á Reykjanesi og við Ölkelduháls. Til að athuga hvort smádýr nýti sér hitann til aukinnar virkni yfir veturinn voru gildrurnar á Reykjanesi látnar ganga í eitt ár. Jarðvegshiti var mældur við gildrurnar og hula mismunandi gróðurflokka metin. Tegundasamsetning smádýra er mjög ólík á rannsóknasvæðunum tveimur en þau eiga samt margt sameiginlegt. Tegundasamsetning breyttist mjög mikið eftir hitafallanda, það mikið að aðeins fáar tegundir fundust bæði á heitri (>50°C á 10 cm dýpi) og kaldri (<20°C á 10 cm dýpi) jörðu og mun færri tegundir fundust á heitri jörðu en þeim sem kaldara var. Í mesta hitanum breyttist virkni smádýra tiltölulega lítið yfir árið en tegundasamsetning þeirra smádýra sem voru virk á hverjum tíma breyttist hins vegar talsvert þar sem kaldara var. Þegar virkni einstakra tegunda var skoðuð eftir hitafallanda kom í ljós að jarðvegshiti hefur áhrif á virkni smádýra en hann þarf þó að vera nokkuð mikill til að hafa áhrif til aukinnar virkni.
Umsjónarkennari og leiðbeinandi er Jón S. Ólafsson, Dósent við líffræðiskor Háskóla Íslands
Meðleiðbeinandi er Erling Ólafsson, Skordýrafræðingur á Náttúrufræðistofnun Íslands
Prófdómari er Guðmundur Halldórsson, Skordýrafræðingur hjá Skógrækt ríkisins
Fyrirlesturinn er opinn öllum meðan húsrúm leyfir