Mótmæli gegn hernaðaraðgerðum víða um heim – sept.-okt. 2001

9. okt. 2001

Hryðjuverkin í Bandaríkjunum 11. september vöktu samhug um allan heim sem líklega er einstæður í sögunni. Hins vegar ríkir engan veginn sami samhugur um viðbrögð Bandaríkjastjórnar.

Í skoðanakönnun sem Gallup http://www.gallup-international.com/terrorismpoll_figures.htm gerði samtímis í 35 löndum um miðjan september taldi yfirgnæfandi meirihluti að ekki ætti að gera innrás í það land eða þau lönd sem hýstu hryðjuverkamennina heldur freista þess að draga þá fyrir dóm þegar sannanir væru fyrir hendi. Í Vestur-Evrópu voru það víðast hvar milli 10 og 20% sem vildu innrás en 70 til 85% andvígir. Í Vestur-Evrópu tóku innan við 10% ekki afstöðu en heldur fleiri í Austur-Evrópu. Í Rómönsku-Ameríku var enn meiri andstaða við hernaðarárásir. Af þessum 35 löndum var aðeins í þremur meirihluti með árásum, í Bandaríkjunum 54% en 30 á móti og óvenju margir óákveðnir eða 16%, í Ísrael voru 77% með árásum en 19 á móti og í Indlandi voru 72% með en 28 á móti.Niðurstaðan var hins vegar engan veginn jafn afgerandi þegar spurt var um hvort viðkomandi væri samþykkur því að hans land tæki þátt hernðaraðgerðum ef til þeirra kæmi. Í Vestur-Evrópu var afgerandi meirihluti meðmæltur því í 10 löndum en jafn afgerandi meiri hluti andvígur í þremur löndum. Utan Vestur-Evrópu var meirihluti hlynntur því aðeins í Tékklandi, Indlandi, Ísrael og Kóreu. Ísland var ekki með í þessari könnun.

Um leið og Bush fór að tala um hernaðaraðgerðir hófust mótmælaaðgeðir. Þar til loftárásirnar hófust á Afganistan 7. október hefur tekist að afla upplýsinga um a.m.k. 275 fundi víðs vegar um heim til að mótmæla hernaðaraðgerðum og ofbeldi, hinn fyrsti í Toronto strax 11. sept.

Þessar upplýsingar voru fengnar með því að senda út á netinu beiðni um upplýsingar um fundi og niðurstöðunni hefur síðan verið dreift á póstlistum hinnar alþjóðlegu andófshreyfingar. Eflaust hafa ekki skilað sér upplýsingar um alla fundi sem haldnir hafa verið. En þessir fundir sem upplýsingar eru um hafa verið haldnir í 60 löndum. Upplýsingar eru um fjölda þátttakenda í 184 af þessum fundum og samanlagt hafa 344 þúsund manns tekið þátt í þeim.

Stærstu fundirnir voru á eftirtöldum stöðum:

20. sept. 5000 manns í Berkeley í Bandaríkjunum, 22. sept. 5000 í Flórens, 24. september 1800 manns í Tókíó og aftur 4000 manns 28. sept.

27. sept. var 30 þúsund manna fundur í Napólí, en sá fundur hafði verið skipulagður með löngum fyrirvara vegna fundar varnarmálaráðherra NATO-ríkjanna sem stóð til að yrði í Napólí en var fluttur í skyndi til Brussel. Annar fundur sem skipulagður hafði verið fyrirfram var í Ottawa 6. október vegna þingmannafundar NATO.

29. sept. var alþjóðlegur mótmæladagur og þá voru a.m.k. 90 fundir víðs vegar um heim. Í San Francisco var 10 þúsund manna fundur en 16. september höfðu 4000 manns safnast saman þar. Í London voru 3000 manns en einnig var 3000 manna fundur þar 21. sept. og 4000 manna fundur 22. sept. og þar hafa að auki verið a.m.k. fjórir smærri fundir. 3000 manns voru á fundi í Berlín en 22. september var 5000 manna fundur þar. 1500 manns voru í Vancouver í Kanada en þar var einnig 3000 manna fundur 23.september. 3000 manns voru á fundi í Aþenu en tveim dögum fyrr var þar 10 þúsund manna fundur. Í Zürich var 200 manna fundur en daginn áður höfðu 3000 manns safnast saman þar. Í París voru 6000 manns og aftur 5000 þann 6. október. 10 þúsund manns tóku þátt í fundi í Barcelona en þar höfðu áður verið þrír smærri fundir. Í Frankfurt voru 5000 manns, 3000 í Los Angeles, 3500 í Montreal, 100 þúsund í Róm, 25 þúsund í Washington.

Í Washington var einnig 6000 manna fundur 30. september en þann dag voru líka fundir mjög víða. Auk fundarins í Washington voru stærstu fundirnir þann dag í Amsterdam, 5000 manns, í Brighton á Englandi, 4000, í Genf 5000 og í Bangalore á Indlandi var 5000 manna fundur 2. október.

Síðan hafa fjölmargir fundir verið haldnir og enn fremur var vitað um 18 fundi í undirbúningi eftir 7. október. En strax að kvöldi 7. október fóru að berast fréttir af fundum sem ákveðnir voru í skyndi. Á nokkrum stöðum urðu mótmælafundir strax að kvöldi sunnudagsins og mánudaginn 8. október voru fundir víða og sumir allfjölmennir, svo sem 10 þúsund manns í Berlín. Í Bandaríkjunum voru boðaðir fundir og mótmælagöngur í fjölmörgum borgum, einnig í Danmörku, Bretlandi, í tugum borga á Ítalíu, Spáni, víða í Svíþjóð, Austuríki, Kanada o.s.frv. Og næstu daga hafa verið boðaðar mótmælaaðgerðir enn víðar. Sjá nánar hér (http://indymedia.org)