Guðbjörg Sveinsdóttir

Ákall frá konum í Írak

Birtist í Mbl. 14.12.2004 

Fréttirnar frá Írak verða skelfilegri með hverjum deginum. Þar er verið að fremja stríðsglæpi og ráðamenn okkar hafa gert okkur samseka um þá. Í okkar nafni hefur ástandið í landinu og líðan óbreyttra borgara orðið verrri en nokkru sinni fyrr þrátt fyrir ógnarstjórn Saddams Hussein, stríð, loftárásir og 12 ára viðskiptabann. Þegar ég var þar sumarið 2003 ríkti lögleysa í landinu og margir voru uggandi um hag íbúanna en helmingur þeirra er undir 16 ára aldri. Meðal þeirra var Margaret Hassan sem nú hefur líklega verið líflátin af íslömskum hryðjuverkahópi. Ég heyrði bæði hana og fleiri konur lýsa þeirri framtíðarsýn sem þær sáu fyrir sér ef Bandaríkjamenn og Bretar létu ekki af hernáminu og þær lýsingar eru því miður samhljóma ástandinu sem þarna ríkir í dag. Þær höfðu áhyggjur af stöðu kvenna í Írak og vaxandi hryðjuverkum gegn þeim af hendi íslamskra öfgahópa, m.a. hópi sem kallar sig Mujahideen Shura og hefur lýst því yfir að þeir muni drepa hverja þá konu sem ekki gengur með blæju (hijab). Þessi hryðjuverk hafa fréttastofur hérlendis þó ekki talað mikið um.

Í norðurhluta Írak í borginni Mosul eru kristnar konur fórnarlömb mannrána, morða og nauðgana. Sumsstaðar hafa karlar nauðgað ungum stúlkum „til að verða á undan Bandaríkjamönnum“. Fjöldamargar konur í háskólum hafa verið beittar ofbeldi fyrir það eitt að ganga í gallabuxum eða vera ekki með blæju. Konur sem heimsækja hárgreiðslustofur verða fyrir árásum og eru klipptar opinberlega þeim til minnkunar. Þúsundum bréfa hefur verið dreift þar sem konur eru varaðar við óíslömsku hátterni, svo sem að ganga berhöfðaðar, mála sig, heilsa karlmönnum með handabandi eða umgangast þá. Meira en 1000 konur hafa hætt hákólanámi til að sleppa undan þessum ofsóknum. Í nafni andspyrnu ræna þeir útlendum konum, jafnvel konum eins og Margaretu Hassan sem vann ötullega að mannúðarstörfum í þágu íraskra borgara og var talsmaður þess að Bush og Blair dragi sig út úr landinu með sitt hersetulið.

Það sem innrás og herseta hefur fært írösku þjóðinni er einna helst lögleysan og uppgangur fasískra íslamskra hryðjuverkahópa sem með hræðslu og hryllingi vilja koma á miðaldalögum sem bitna verst á konum og börnum.

Samtök kvenfrelsis í Írak (Organization of Women’s Freedom in Iraq) hafa sent ákall til kvenna hvar sem er í heiminum að sameinast þeim til að verjast þessum hryðjuverkum og berjast gegn íslömskum öfgahópum (sjá vefsíðuna www.equalityiniraq.com). Viðhorf þeirra gegn hersetunni endurspeglast í ákallinu og þær segja: „Meðan hersetan varir munu íslömsk hryðjuverk vaxa og dafna.“

Örlög Margaretar Hassan réðust af afvegaleiddri pólitískri stefnu karla sem í krafti stríðstóla og vegna menningarlegs ólæsis hafa varðað leiðina fyrir ofbeldi og stjórnleysi.

Ekki í mínu nafni!

Guðbjörg Sveinsdóttir