Einar Ólafsson

100 þúsund manns á World Social Forum sem lauk í Mumbai 21. janúar

22. janúar 2004

Miðvikudaginn 21. janúar lauk fjórðu alþjóðlegu ráðstefnu alþýðuhreyfinganna, eða hvernig sem maður reynir nú að þýða World Social Forum (WSF). Að þessu sinni var ráðstefnan haldin í Mumbai (sem áður hét Bombay) á Indlandi. Fyrstu þrjár ráðstefnurnar voru í Porto Alegre í Brasilíu. Fyrstu ráðstefnuna,árið 2001, sóttu um 20 þúsund manns og var það miklu meira en búist var við. Næst komu 55 þúsund manns og árið 2003 voru 100 þúsund manns á ráðstefnunni. Talið er að álíka margir hafi sótt ráðstefnuna nú. Skráðir ráðstefnugestir voru frá 132 löndum og 2660 samtök voru skráð sem aðilar að ráðstefnunni. Ef einhver hefur séð eða heyrt eitthvað um þetta í íslenskum fjölmiðlum þætti mér vænt um að frétta af því.

Þessi ráðstefna er raunar engin ein ráðstefna heldur mörg hundruð ráðstefnur, fundir og samkomur til að ræða þann vanda sem steðjar að alþýðu heimsins á tímum hnattvæðingar, óhefts kapítalisma, heimsvaldastefnu, hernaðarhyggju, arðráns og umhverfisspjalla. Þessar ráðstefnur voru upphaflega fyrst og fremst sóttar af liðsmönnum samtaka sem hafa haft sig í frammi gegn hinni kapítalísku hnattvæðingu en þrátt fyrir tómlæti fjölmiðla hafa æ fleiri áhrifamenn, sem ekki hafa verið þekktir fyrir að standa í götumótmælum, látið sig þessar ráðstefnur varða. Meðal hundraða manna sem fluttu framsögur eða tóku þátt í pallborðsumræðum má nefna eftirtalda ef einhverjir kannast við nöfnin: Shirin Ebadi, Arundhati Roy, Ahmed Ben Bella, Mustafa Barghouti, Mary Robinson, Vandana Shiva, Fausto Bertinotti, Joseph Stiglitz, Walden Bello, George Monbit, Rigoberta Menchu Tum, Eric Toussaint, Winnie Mandela, Ramsey Clark og meira að segja Paul Nyrup Rasmussen. Sum þessara nafna hafa vissulega orðið til þess að ýmsir hinna róttækari hafa óttast að bitið sé að fara úr WSF. Það þarf þó ekki að vera. Þess má geta að stefnt er að því að halda þessar árlegu ráðstefnur utan Evrópu og Norður-Ameríku til þess að fólk frá hinum fátækari löndum Asíu, Afríku og Rómönsku Ameríku eigi hægara með að koma og nú þótti t.d. mikils um vert að færa ráðstefnuna frá Brasilíu til Indlands og væntanlega verður reynt að halda hana í Afríku sem fyrst. En svona rétt sem dæmi um þann anda sem einkennir þessar ráðstefnur má geta þess að hvorki Coca-Cola né Pepsi var í boði til að svala þorstanum. Hins vegar var nóg af ávaxtasafa sem framleiddur var heima fyrir. Og tölvukerfi sem notuð voru í sambandi við ráðstefnuna voru sótt til Linux frekar en Microsoft.

Hér verður ekki gerð tilraun til að fara neitt í saumana á öllum þeim umræðum sem hafa verið í Mumbai undanfarna daga. Vonandi gefst tími til þess síðar – að einhverju leyti. En ráðstefnunni lauk með fjöldagöngu tugþúsunda manna sem riðluðu umferðinni í milljónaborginni og þar var haldið upp kröfum og slagorðum gegn stríði, heimsvaldastefnu, arðráni og öðrum andstyggðarfylgifiskum kapítalismans.

TerraViva: http://www.ipsnews.net/focus/tv_mumbai/index.asp

Guardian: http://search.guardian.co.uk/search97cgi/s97networkr_cgi?QueryText=World+Social+Forum&Action=Search&Collection=archive_artifact&ResultTemplate=Archive_Artifact.hts&SortSpec=VdkPublicationDate+Desc

India Indymedia: http://india.indymedia.org/

Tidskriftcentret.dk: http://www.tidsskriftcentret.dk/index.php?id=319

IV Ciranda: http://www.ciranda.net/publique/

Umfjöllun á síðu WST: http://www.forumsocialmundial.org.br/noticias_01.asp?cd_news=956

Lokaávarp 4. WSF: http://www.focusweb.org/popups/articleswindow.php?id=402

Vefur WSF 2004: http://www.wsfindia.org/event2004/wsforg.php