|
|
Ljóð
HongKong 2000
höfuðáttirnar þrjár
eru ekki nema tvær: austur. þeim má
raða eftir eftirfarandi flokkunarkerfi:
a) skýjakljúfar sem eru byggðir
á bambus
b) skýjakljúfar sem vaxa inni í
bambusneti
c) skýjakljúfar sem eru með njósnagötum
fyrir dreka
d) skýjakljúfar sem eru ekki lengur
til
e) voru aldrei til
f) en eru fjarlægur möguleiki í
draumi bambusstilka
g) svo má hugsa sér skýjakljúfa
sem liggja láréttir
h) skýjakljúfa sem kljúfa ekki
ský
i) skýjakljúfa sem kljúfa fjöll
j) skýjakljúfa sem tengja höfuðáttirnar
þrjár: austur og vestur
k) skýjakljúfa sem eru holir að
innan og standa á fjórum fótum
eins og geimskip
l) skýjakljúfa sem hýsa fólk
m) og skýjakljúfa sem geyma dreka
n) ekki má heldur gleyma þeim fjölmörgu
smáhýsum, kofum og tjöldum sem
hvergi finnast inni á milli skýjakljúfanna
o) nema í mesta lagi má sjá
sölutjöld á markaðsdögum
p) sem eru alla daga
q) og selja dreka
r) drekum
s) í markaðsþorpinu stanley er
svæði sem er ótrúlega laust
við skýjakljúfa
t) en þeir eru enn í fjötrum bambusneta
og rísa skjótt
u) þar má hitta úngan breta
sem stundar sjóbretti (björk-country
sagði hann um ísland)
v) og hræðist ekki hákarlana sem
sveima utan varnarneta
x) ég ráðlagði honum að
fara utar
y) þarsem meiri líkur væru á
hákörlum
z) sem kljúfa sjóinn með uggum.
þ) út um gluggann okkar á elleftu
hæð sáum við yfir auðan
og dáinn flugvöll
æ) ég tók það sem
tákn um að við kæmumst aldrei
burt
ö) það reyndist óskhyggja
úd
|
|
|
